uTouch 愛情短文系列 -《我有情緒病,係咪代表我無愛人同被愛嘅權利?》

「我有情緒病,係咪代表我無愛人同被愛嘅權利?」
 
呢句說話出自一個24歲有長期情緒病患嘅女仔對我講,呢句說話一下子深刻地刻在我腦海之中。
 
大約兩年前,敏儀透過網上輔導服務搵到我地,當時佢同我講一直以嚟都得唔到一個穩定嘅愛情,好多時對方答應過承諾過會對佢好好,會給予最大包容,但可惜每個伴侶都做唔到而分手收場。

傾談之間,知道原來敏儀有情緒病問題困擾好耐,經常會爆發情緒,男友自然係首當其衝接受嘅一個,時間一耐,好多都忍耐不住而選擇離開。敏儀開始覺得自責點解會有情緒病,而每一次分手亦都為佢帶來傷害,佢對於愛情根本沒有任何憧憬。

「我有情緒病,係咪代表我無愛人同被愛嘅權利?」

當我同敏儀見面時,佢問咗我呢條問題,嗰一刻我當然唔認同,但我應該點樣證明比一個飽受情緒病困擾而歷盡愛情失敗收場嘅敏儀去知道呢一句說話係唔岩呢?

「我成日唔知點解無啦啦會喊,晚晚都喊,男朋友永遠都係做哄我嘅角色,見佢好辛苦咁哄完我之後,唔洗一日我又喊,佢都開始累,我都開始累。後來我忍住唔喺佢面前喊,就算喊出嚟,我都會即刻拎轉面抺眼淚扮冇野,因為唔想再比到麻煩佢,更加唔想佢開始討厭我有情緒病而同我分手…..」

敏儀細訴佢愛情經歷,彷彿每一次拍拖都不斷重覆同一種傷痛,要知道,同一個患有情緒病嘅伴侶係需要好大耐性同包容,曾經亦有一個個案,當事人同一個患有中度抑鬱嘅女仔一齊半年,拍拖前佢曾經覺得自己有能力去令到女朋友病情好轉,每一次對方發脾氣或爆發情緒時都會好比心機去遷就佢、氹佢、鍚佢。

但當佢每次返完工,帶住疲倦身驅返屋企時,女朋友就喊住打嚟希望可以陪佢。漸漸地,當事人開始覺得好辛苦,最令佢痛苦地方係,大家明明互相深愛對方,但卻有一個情緒病而令大家關係都感到一種無力感。

「或者有一日你會好返,又或者搵到一個能夠百分百接受包容你嘅人。」我說。

「我都希望可以遇到,不過就算遇到,都驚對方因為自己有病而驚我出事先繼續勉強一齊……」敏儀依舊都偏向負面。

呢兩年間,我一直陪伴住敏儀面對新戀情,中間與男友相處之道,如何改善情緒病,約見醫生等等。

直至琴日,我參與敏儀證婚,經歷過萬難之下結成連里,講真,我都有啲擔心,不過當我聽到佢老公嘅深情說話時,我都開始放心並祝福佢地。

「我老婆成日都話自己係一個負累,好驚麻煩到我,當我求婚時侯,佢都仲係覺得自己一個負累,我覺得敏儀有樣嘢真係好錯,錯就錯在佢唔知道自己其實對我嚟講好重要,喺我人生低谷時侯佢都陪住我,亦都好真誠咁對待我,事問呢啲仲點會係負累,係,兩個人一齊自然會遇到好多問題,但結婚係一生一世嘅事,正如我岩岩宣誓所講,『從今以後無論係順境定係逆境,富貴或貧窮,健康或疾病,我都會永遠愛你、珍惜你,直到地老天長』,呢句說話係我對你承諾,我一定會好好照顧你,用更多更多時間同心機去鍚你,愛你,所以,敏儀,你可以放心。」

在場掌聲哄動,最後個句」你可以放心」亦都教我放心,希望你地可以幸福快樂落去。

愛情本身就係一件複雜嘅課題,喺一件複雜課題上加一個情緒病,更加令到成件事更難應對。

就算你明白對方感受,但你都未必會認同
當你唔認同時侯,喺伴侶眼中就等於唔明

呢個時侯作為大家都變得好無助亦好難受,不妨順應住佢嘅思路,比佢抒發,中間不時加幾句正能量說話,但不宜太多,因為講真,道理嘅野佢點會唔明,只係佢潛意識地令佢去壞個一邊去諗。

如果你係照顧有情緒病嘅一方,要有心理準備比正常伴侶更要擔當一個重要角色,包容同時間都要付出最大心機,但記住,無論點都好,自己嘅感受點都要顧及,亦都唔需要過份將全副精力放喺呢段關係上,點都要有自己空間,咁先令到身心都可以同伴侶繼續走更遠嘅路。

而有情緒病嘅你,不妨趁自己平靜期間多向伴侶表達一下自己感受,至少令對方明白原來你某些行為是病而引起,加強雙方了解,減少不必要的誤會。

有情緒病,唔代表無愛人同被愛嘅權利
共勉之

 

立即捐款 支持青協

 

 

我想立即捐贈

支持青協