《復合的意義》

「社工,我真係崩潰,好辛苦。」

大概一年前一個深夜晚上,正當我準備收工時侯,突然收到呢個Whatsapp Msg。

本來想回覆對方當值時間已經結束想叫佢聽日再搵時,對方已經準備千字文比我睇了,從字裡行間之中都感受到對方嗰種崩潰情緒,而我都放返低個人物品,專注咁閱讀佢嘅故事。

Kathy(假名) 同一個拍咗兩年嘅男朋友分手了,佢好唔捨得對方,好想同返對方復合起返埋一齊,但自從分手之後,對方雖然肯做朋友,但拒絕再傾有關感情嘅事,直接將復合嘅大閘關上。

呢件事為Kathy帶來好大打擊,加上Sem尾將至,功課考試一堆一堆迎面而來,令佢更加大壓力,根本無心情去溫書,亦都唔想搵朋友傾訴,好多人以為Kathy係讀書壓力問題,但其實係從一件感情事件之中引發一連串情緒困擾效應。

分手從來都係一件難受嘅事,但事出必有因,於是我問分手原因係咩?

Kathy承認自己各方面都唔係做得好好,例如經常對男友發脾氣,相處上都唔係話真係太夾,經常嘈交。不過,Kathy表示真係好鐘意對方。

有時侯分手唔係一時衝動嘅事,背後可能已經每時每刻都反覆思量過,分 定 唔分?

呢一晚同Kathy傾咗好耐,同佢回想起過往拍拖時侯相處所發生嘅點點滴滴,當中同佢反思一下開心同唔開心嘅原因。

我好明白每段感情關係去到分手時侯,當對方提出因為自己行為態度而分手,第一反應通常都係 」 我可以去改 」 但好多時改之前,都會提出必須要復合咗先。

但其實換個角度去睇,分手已經係一次傷害,復合後其實代表可能會有第二次傷害,所以復合之前必須要考慮好多因素,要真實了解分手原因,確立自己除咗呢啲因素之外,仲有冇其他相處問題,自己同對方係咪仲有信心去修補返關係。

始終,感情嘅事從來無人可以控制得到,分手之後當然關係已經出現裂痕,有人可以將裂痕修補變得更鞏固,但亦有人因為傷痕變得永遠埋唔到口。

所以,復合之前真係要認真考慮多啲,為對方又好,為自己又好,盡量避免再讓二次傷害再次出現。

最後,Kathy都無同對方復合,而我同佢輔導目標亦都轉向點樣從情傷之中重新振作起來。

對於Kathy嚟講,時間就係最好嘅情傷良藥。

一年後嘅今日
Kathy畢業禮,曾經明言自己唔會放低對方,無咗對方生存唔到落去嘅佢
見返前度出現喺大學於自己面前,已經可以展露笑容,輕鬆面對到返前度。
呢一年,辛苦你了,Kathy。

發表回覆

你的電郵地址並不會被公開。 必要欄位標記為 *