《虔誠地廝守 都會傳奇》

「喂,你鍾意我多啲定係你個ex多啲呀?」

呢個問題相信每一對情侶都有經歷過,不論你係問人嗰個、抑或係畀人問嗰個。

「仲洗問?緊係你啦。」我笑笑口咁答。

呢刻緊係你啦,大佬呀,我同ex散咗成五年,同你一齊都三年啦,會唔會係仲鍾意緊個ex呀?

「唔係講呢刻喎,我係講緊你最鍾意我嗰刻同你最鍾意佢嗰刻比呀。」

聽到呢句,我不禁打咗個突,我女朋友從來都唔算聰明,亦唔係啲鍾意尋根究底嘅人,但唔知點解每次講到呢啲話題,佢就會突然變到好似貓一樣咁敏感。

「雖然好難咁樣比較,但我嘅答案都係你。」我嘗試表現得好肯定咁答佢。

女朋友用狐疑嘅眼光望住我:「真係咩?我見你同佢一齊嗰陣愛得好轟烈架喎, 拍拖一個月又會喺FB post相啦,嘈交就會喺IG story度要生要死啦、佢呀婆養緊隻倉鼠死咗你又要出文悼念啦……(下刪一萬字)」

十分鐘之後,佢終於得出咗佢嘅結論。

「所以,你係咪鍾意佢多啲呀?」女朋友嘟住個咀問我。

見到佢呢個咁可愛嘅表情,我忍唔住玩下佢:「你咁講…咁又好似真係喎。」

「__!咁你搵番佢囉!」女朋友聽到呢句,一下就喺我面前表演中國傳統技藝 – 變臉。

「唔好嬲唔好嬲,講笑咋。我認真答喇好未?」我即刻拖實佢隻手,廢事佢陣間又發脾氣走咗去。

「其實,唔係下下都要做show咁先叫愛得深架嘛。

你覺得唔Post相就代表唔sweet咩?我唔post相係因為我覺得我哋會一直細水長流咁愛落去,如果個個月都要刻意post相,反而變到好似例行公事咁,只要有一次唔post,啲人就會諗我哋係咪分咗手,係咪唔再sweet。

小姐,我同你拍拖係因為鍾意你呀,即使我哋將來要同雙方家人交代,但係我唔洗同全世界交代架。

我唔需要全世界都知道我幸福,我只係需要你知道,你,係我幸福嘅原因。」

真架,其實兩個人喺一齊,簡簡單單,就夠。

「唔…咁…即係你都係鍾意我多啲架可?」女朋友仍然係唔放棄。

我冇口氣咁答:「係喇係喇,最鍾意係你喇,呢生呢世都最鍾意你呀得未?」

「嘻嘻,你話架,第時反口你就知死。」

虔誠地廝守,都會傳奇。

————————————-
【uTouch】http://utouch.hk
Instagram:utouch_hkfyg
Facebook:utouch.hk
Whatsapp:62778899

發表回覆

你的電郵地址並不會被公開。 必要欄位標記為 *