uTouch 愛情短文系列 -《我哋分手啦! 我忍夠你!》第一回


「__!我唔出嚟啦!你自己食飽佢!」

手機whatsapp彈出呢個msg。
「Fine!」我秒回︰
「我哋分手啦!我忍夠你!」
————————–————————–—————
我叫阿文,依家企喺旺角朗豪坊外面,等咗女朋友接近3粒鐘。
而我女朋友阿雯,無錯,就係啱啱__我嗰個,本身約咗我一齊食lunch,但事緣我太餓,就自己食野頂住先。
然後,佢就開始爆。
.
「又話一齊食? 依家你又自己食!」wts一個emoji都無,好明顯佢啲情緒開始黎了。
「喂咁我等左你3粒鐘喎!我都未話你,你話返我轉頭﹖」
「如果你自己食,就唔該講聲我知!」
「點講你知﹖你訓到依家先出門口!」
「呢個世界有電話可以打!亦都有whatsapp可以send!咁我就唔駛專登撲出黎搵你!」
「又係我錯呀?!」我諗起「春嬌救志明」嘅對白,呢一刻,我真係好明白張志明嘅感受,「我肚餓食野都唔得﹖」
「係係係!你無錯!你永遠都岩!自私食!有無諗過我感受?!」
.
如果我無諗你感受,我就唔會企係度等你,我就唔會忍住唔打電話比你,因為我怕語氣唔好,因為,我真係唔想大家再嗌交。
.
但嗌交就好似訓覺起身一樣,成為咗我哋拍拖主旋律,點避都避唔到。
.
「呢幾個月你除咗返學返part time之外,仲有咩時間理我?! 食飯已經係我哋唯一可以一齊做嘅事!依家你連lunch都自己食,你真係好自私!點解你可以對我咁差!」
可能阿雯見我無覆佢,於是更加嬲,係咁打字過嚟。
.
唔知點解旺角等人一定要揀朗豪坊,我身邊企住唔少男女,大家都低頭禁手機。
「到左好耐啦﹖」對面有個女仔跑緊過黎。
「唔係呀岩岩到咋」我隔離嗰個男仔即刻笑淫淫咁答。明明一個鐘之前就已經企咗喺度。
.
望住齊齊等人嘅同志一個又一個比人「領走」,真係倍感孤單。
.
唔知由幾時開始,我同阿雯連食lunch都可以嗌交,我完全理解唔到點解我肚餓食野先,都可以話我自私,其實真正自私嘅,又係邊個呢。呢一刻,我真心好攰,對於呢段關係、呢個人,我覺得已經無力氣維繫落去。
.
「__!我唔出黎啦!你自己食飽佢!」手機wts彈出呢個msg。
「Fine。」我秒回佢︰「我哋分手啦,我忍夠你。」
.
手機嗰邊忽然靜咗,我望住whatsapp個畫面好耐好耐,都無有新嘅msg彈出。可能,今次真係最後一次,我哋嘅關係互相折磨咗咁耐,終於黎到盡頭。
.
「好,再見。」10分鐘後,我收到呢個msg。
.
再見。
陳家雯。
同你一齊咗1年又8個月,到今日,我哋終於分開。
.
之後嘅32個鐘,我哋無再有任何聯絡。
.
踏入第33個鐘,我行落屋企樓下。
.
佢企咗係度。
原來佢一直等緊我出現。
.
我腦海忽然諗起佢琴日嘅一句話︰
「食飯已經係我哋唯一可以一齊做嘅事。」
忽然,我覺得自己有啲眼濕濕,我企咗係度,唔知應唔應該繼續行過去。
————————–————————–—————
待續。