uTouch 愛情短文系列 -《我哋分手啦! 我忍夠你!》第二回

 

我最後都決定行過去阿雯度,每行一步,呢1年又8個月嘅回憶,就一格格好似電影咁喺我腦海播出黎︰

第一次約佢出街,我寫哂計劃書,有哂planA同planB,好驚佢會覺得悶;

聖誕約食飯,佢問我想中意食啲咩,我話我中意你,然後佢笑咗好耐;

放學佢唔介意等埋我練波,就算要等4、5個鐘,都想一齊拖住手走;

我病既時候佢好心急、唔知點算,惟有買一大堆維多C、寶礦力俾我;

我生日嗰日佢第一次整cheese cake,上面鋪咗好多藍莓,但全部沉哂落去,之後先知道原來佢落錯咗鹽係糖,我恥笑咗佢勁耐,仲post埋上IG;

終於,我行到佢面前,攬住佢。
原來除左嗌交,我地仲有好多好多其他回憶,我地一直遺忘咗。

三日後。

我同阿雯買咗啲包係海旁食。
「對唔住呀。」阿雯失驚無神咁講,我嚇到差啲噎死。
佢份人平時咁要面子,竟然主動講呢啲。
「咳….咳….UP乜__呀你? 做咩無啦啦講對唔住。」
「我知我成日發癲,但其實講真,有時我知自己有唔啱,但就係控制唔到自己,我都唔想咁。」
「咁你自己都好難受嘅。」我望住佢咁頹,安慰地拍一拍佢個頭,佢好自然咁訓落黎。
.
好warm,好想時間一直停留喺呢一刻。但難得佢肯主動傾呢個話題,我自然要配合,唔溝通,一段關係又點會有前途。
「不如你話我知,你當刻諗緊啲咩﹖咩原因令你嬲到咁﹖」
「我以為你食咗野,就唔會再陪我食lunch,咁食飯又係我哋最近唯一可以一齊做嘅事,個一刻,我覺得你好似拋棄咗我咁,我覺得自己唔重要。」
.
講講下,阿雯開始眼濕濕。我知道佢係真心講呢番說話,都有啲動容,更加覺得唔可以hea覆佢。所以,我都靜咗,認真消化佢嘅說話。
「其實呢,係我做得唔太好嘅,」我攬住佢,「我應該講清楚,就算我食咗野,都好願意同你再食過,不過個時我都有啲情緒,話就話無怪你,但其實啲語氣都係責怪緊你,我自己都口不對心。」
.
拍拖咁耐,今次係第一次,我哋可以咁平心靜氣傾返之前嗌交嘅事,大家都願意開心見誠咁講。忽然之間,我覺得可以同呢個女仔一齊行落去,行好耐好耐。
.
「係我唔岩在先,遲到仲咁惡。」佢略帶歉意望住我。我忍唔住笑出黎,
「咁呢個都係你本性嚟既,無論你岩定唔岩都係咁—–喂喂喂!好痛~~好痛!」我未講完,阿雯已經一口咬落我手臂!

__啲女人係咪睇得喪屍片多,咁中意咬!

「我認真架!」阿雯個樣好苦惱,「我唔想成日嗌交,遲早真係分手。」
「嗱,」我收起笑容,認真咁望住佢,決定將我長久以嚟既心聲講出嚟︰

「其實肚餓食唔食啲野先,純粹係一個選擇。
但你就會定義咁樣係咪愛你。
點解咁樣做就叫『愛』、咁樣就叫『唔愛』? 
愛嘅表達同定義,應該雙方一齊定義出嚟嘛,係咪?
我依家就同你講,我,李文,好中意你,陳家雯。
所以,唔好再否定我嘅感受同心意喇,好嗎?
你每否定一次,我就覺得一切付出好似無意義咁。」

「求婚咩?! 講到咁!」
「嗱,你又諗多咗啦。」
「收__啦。」佢笑住打咗我一下。
「其實之前有朋友話過我成日咁易唔開心,又控制唔到情緒,唔知係咪有情緒病,叫我搵人幫下手,你….你覺得呢﹖」
———————————————————————————————-
待續。