某個晚上，突然有個女仔向我地求助，佢不斷打好多字比我地，表示非常無助，情緒感到極大困擾。
於是我關心地問：「先冷靜一下，我會一直喺到同你傾，可以講我聽發生咩事？」
對方似乎都意識到自己打字太快太急，於是都停一停，然後再慢慢講我聽發生咩事。
「我叫Winnie，近半年嚟我都好唔開心，我經常都控制唔到自己，我會突如其來好驚，好驚會死……之後就會做啲異常又令人奇怪嘅行為……」
「係咩行為？」
「一種好多人都話我好似撞邪嘅行為……」
我個人嚟講唔係好相信撞邪呢啲事情，但對方又講得好認真，經過一輪對談，我大概懷疑winnie 患有驚恐症。
所謂嘅驚恐症，係指患者喺無任何危險或壓力情況下，都會感受到一股恐懼同焦慮。呢種突如其來嘅恐懼會令人產生強烈嘅不適，仲會呼吸困難同手震問題。
由於文字對談有限制，文字亦好難表達出winnie嘅處境，加上每次病發時，winnie 都控制唔到自己，於是我都花咗唔少時間同佢建立案主關係，終於相約到佢嚟我地中心見面。
對於從來無處理過驚恐症嘅我實在有點挑戰。加上第一次見winnie，我內心都有點戰戰競競。
同事將winnie帶到入輔導室，我都準備完相關文件準備推門入去。
當我見到winnie時，佢滿頭大汗，眼神空洞，見到我後一臉更加緊張。
我先坐下，然後問：「口唔口渴？ 拎杯水比你飲？」
Winnie 搖搖頭示意唔需要。
我見出面陽光有啲刺眼，於是起身走到窗邊說：「 好似有啲殘眼，我拉一拉個窗簾先。」
「唔好！就咁喇！」winnie突然緊張地叫停我。
我望一望Winnie，再望一望窗簾，然後點點頭慢慢坐返低。
「Ok…..之前一直喺Whatsapp同你傾關於你有驚恐症嘅困擾，即使你去咗睇醫生都只係開一啲抗抑鬱藥比你，但你覺得無咩幫助之餘，啲藥仲令到你無咩精神返學，你嚟搵我地係想我地幫你解決呢個問題?」
「其實搵你地之前，我都有搵社工，只係覺得無咩用，之後見到原來網上都有社工…..咪試下搵你地。」
「不如你講下你咩情況之下會發作…..同埋講下發作時會點樣。」
「其實我都唔係好知幾時開始有呢個病，最記得大學有一次Presentation，本身一直都好地地，但當個Tutor熜咗燈之後，我突然間好似控制唔到自己咁，全身都好驚好震…..之後我就唔知自己做過啲咩嚟，好多同學話返比我聽，佢地見到我好似失咗控咁，一直震住匿喺張枱下面。」winnie 一路講，我留意到佢個身體一路震緊。
我望望窗邊，然後說：「所以你岩岩唔想我關窗簾，係因為太黑……或者會令到你發作。」
Winnie 點頭示意。
後來對話之間更發生一段小插曲，winnie突然身體震得更利害，雙眼反白，不斷將頭個向身後嘅牆撞去，我不斷叫停佢勸佢放鬆身體，最後我亦開門大叫要求支援。
𠴱次面談之後，大概我都明白點解班同學仔會覺得佢撞邪，Winnie嘅病係由大學開始，每次天黑或喺昏暗地方底下，Winnie都會覺得好驚，每次夜晚瞓覺為咗唔影響室友，都會去廁所開住燈瞓覺。
同時間，每次面談，winnie都鼓起好大勇氣去見我，因為Winnie提過有次搭巴士嚟搵我時侯，經過隧道時，由於昏黑環境底下亦都令佢發作不斷震，身邊嘅人都好似覺得佢撞咗邪咁，令佢好難堪。
當我提出會唔會轉地點更方面見面時，winnie拒絕，佢希望可以克服到。我亦感到安慰，因為佢改變動機都大。
為咗減輕發作時侯出現嘅失常行為，我地都建議Winnie盡量分散自己注意力，學習一啲放鬆技巧，幫助紓緩焦慮、不安嘅情緒，同時亦配合醫生指示定期服食藥物，情況都改善咗好多。
某日，當我離開輔導室正想關門時，同事遠處大叫：「喂！陣間借間房嚟見case！」
我即刻細聲說：「殊……我Client瞓緊覺，你搵第二間房喇！」
我再望向輔導室內，陽光照射底下，Winnie伏在桌上一臉安穩的樣子滿足地睡著。
驚恐症是情緒病的一種，約每75人中便有1人患上，而女性的患者較多。
目前仍未清楚了解驚恐症的成因，但相信與遺傳、壓力、腦部物質失衡有關。
要預防驚恐症再發作，患者要學懂放鬆，避免情緒過激及壓力太大，多做鬆弛練習。
《完》
請Like 我地Facebook / ig，以示支持，有更多故事帶比大家！
記得like我地page～
如果大家想找人傾訴，我們很樂意和你詳談
大家亦可以嘗試我們的輔助小精靈，去了解自己，測試你的快樂指數。
http://m.me/utouch.hk
https://hearforyou.hk/tc/home
想了解多d 有關情緒服務，可以上呢個網址＝)
#情緒支援
#hearforyou
#wellness
#utouch
******************
Instagram：http://instagram.com/utouch_hkfyg
Facebook：utouch.hk
Facebook inbox：http://m.me/utouch.hk
Whatsapp：https://wa.me/8