《人愈大,無諗過自己開始出席身邊親朋好友嘅葬禮》 

某個晚上當值時侯,網上有個案求助,內容大概係好友去世,令佢感到傷心。

「我雖然好傷心,但我ok,我搵你傾只係想傾下無咗好友嘅感覺。」阿May可能怕我認為佢個案嚴重,所以先同我講打定底,說明佢無事,只係純粹想傾下計,而我當然樂意配合。

整個晚上,阿May分享第一次出席好友葬禮嘅感受,佢話今年二十四歲,但過去從來無去過葬禮,估唔到第一次出席,就係自己好朋友。

「我地由中學開始玩到大,即使大家升咗唔同嘅大學,發展各自嘅生活,但圍內好友一直都保持聯絡。有次聚會仲話疫情完後,約埋一齊出國旅行,估唔到……承諾未兌現,佢就突然因病去世,而且係隱性病,從來都無人知。收到消息之後,以為係Fake news,但事後知道後大家都好驚訝,我都唔知自己流咗幾多眼淚,不斷睇返合照,不斷回憶以前一齊相處嘅日子……」

阿May續說,當佢同朋友出席葬禮時,見到好友嘅家人哭成淚人,呢個畫面深深刻在佢腦海入面,不自覺地代入,幻想將來自己親人離去,一諗到咁,個心就更痛更難受。亦開始知道,自己年紀愈大,代表親人年紀亦開始老,生離死別嘅日子亦隨住時間過去而漸漸走近。

「我明白呢個係必然發生,只係我仲未有心理準備接受,我剩係諗下都已經好驚。」

呢一晚我地傾咗好多,我亦分享唔少看法,要脫離傷痛,老套講句,真係需要時間來沖淡,而眼淚係必然流下,但小心一點,喊同傷心係正常,千其唔好將呢種表達情緒嘅行為諗到負面,適當嘅情緒表達係有助幫我地身心舒服,如果夾硬令自己唔流淚,夾硬要自己麻目,反而更令人擔心。

所以,多啲搵人傾下,好好為親人好人安排身後事,亦為自己失去對方而調整一下生活,重新適應對方,相信好快會走出困局。

同樣地,好好珍惜眼前人,雖然亦都係好老套,但好多老套嘅說話,都係由過去嘅人所經驗累積出嚟,就係想我地後代唔好重覆佢地嘅遺憾。

******************************************

大家亦可以嘗試我們的輔助小精靈,去了解自己,測試你的快樂指數。
http://m.me/utouch.hk
 
https://hearforyou.hk/tc/home
想了解多d 有關情緒服務,可以上呢個網址=)

#情緒支援
#hearforyou
#facebook
******************
Instagram:http://instagram.com/utouch_hkfyg
Facebook:utouch.hk
Facebook inbox:http://m.me/utouch.hk
Whatsapp:https://wa.me/85262778899

發表回覆

你的電郵地址並不會被公開。 必要欄位標記為 *