琴晚返屋企時侯，返工返咗成日，身心都好疲倦，面對住生活種種壓力，真正令我感到喘息嘅時間同空間，就係放工搭車返屋企嘅時間。
可能壓抑得太耐，好想好好抒發一下自己情緒，但苦無方向，唯有聽住啲慘情歌曲，聽到有共嗚時侯就會痛心地滲出眼淚……我嘅人生係咪就係咁落去?
落車後，突然有人從後拍一拍我，我嚇咗一嚇。轉身一望，原來係昔日嘅中學同學阿軒。
「喂，好耐無見，你最近幾好嗎?」阿軒客氣地問。
我呆一呆，然後竟然違背自己感受地回應：「我最近…..幾好呀。」當我講完後，腦海即時喺到諗，明明我前一刻仲係覺得自己人生好慘，明明自己生活好大壓力，點解當有人問我最近點時，我竟然會回應我幾好?
阿軒聽後感到開心:「咁好丫，我就唔同，我失業失咗幾個月喇。」
我望住阿軒，佢毫無修飾咁直接表達佢面對嘅困難，反觀自己……
「我相信疫情過後，經濟會慢慢回復返，你要堅持落去。」雖然我唔係好識點樣安慰人，但我真心希望我嘅說話能夠鼓勵到阿軒。
「希望喇，唯有Keep住搵，搵唔到都無辦法。我呢家趁時間多咗咪做下運動，練下體能，等自己有返啲目標，無咁頹呀嘛。」阿軒正面地說。
我微笑回應，但心裡會覺得會唔會太正面，如果我嘅壓力可以做下運動就可以解決得到，我估我24小時都去做。
「唔講喇，我行嗰邊返去。喂，其實難得我地住得咁近，應該平時約多啲出嚟吹下水。」阿軒說。
當我正想講：「好呀，搵日喇。」但諗咗陣，又覺得好似好麻煩咁，有時間都抖下打機仲好。
我未回應，但阿軒亦續說：「吹下水傾下計，個人都放鬆啲，至少……我想有人同我講下嘢，講下我生活，講下我面對緊啲咩。」
我呆呆望住阿軒，雖然佢表面睇落好正面，但實質原來佢都需要有人同佢傾計。又或者，我都需要勇敢面對自己問題，然後搵個人陪我傾下計。
「好呀，就聽晚，講下大家最近點。」
阿軒微笑後便轉身離開，我望住佢背影，唔知點解覺得個人輕鬆咗，原來短短幾句對話，可以令我狀態唔同哂，但明明我嘅問題仍然喺到，心裡反而覺得釋懷。
我開始明白點解阿軒咁想搵人傾，我亦都明白自己其實都想搵人傾。
我諗下次再有人問我 」 你還好嗎 「
我會勇敢地回應我真正自己 : 「其實唔好。」
過去五月天，大家生活還好嗎?
疫情下，人與人之間要保持米幾距離，社會種種事件亦令情緒受到牽動，生活壓力亦受到挑戰。
但無論如何生活過成點，五月天總會過去，迎接我地嘅仲會有六月、七月、八月….
所以我地要勇敢積極地面對。
就好像五月天首倔強歌一樣
就算失望，不能絕望
如果有任何煩惱都可以搵我地傾下計
亦都可以試下了解自己，做我地個輔助小精靈
睇下自己快樂指數去到幾多 =]
————————————-
【uTouch】http://utouch.hk/
Instagram：http://instagram.com/utouch_hkfyg
Facebook：utouch.hk
Facebook inbox：http://m.me/utouch.hk
Whatsapp：https://wa.me/85262778899