近年好多人都會喺網上留低個人資料,或者透過交友APP嚟認識朋友,傾耐咗好自然會有想進一步認識對方嘅諗法。當我哋想將網友「升Lv」做朋友,甚至想約對方出嚟見面嘅時候,為咗減低中伏風險,我哋有啲嘢可以做咗先!

 

  1. 檢視對方社交網站

 

好多時我哋同人傾計都會提及自己嘅一啲個人資料或者背景,呢啲時候不妨提出Add對方Facebook或者Follow對方Instagram等等嘅要求,起一起對方個底,睇下對方係咪真係如佢所講咁嘅先!

 

如果對方唔肯,又或者你睇完發現有可疑 (例如對方Account裡面冇可以幫你確認到對方真實身份嘅資訊),呢啲情況你就要再思考下對方係咪可信喇。

 

當然啦,你起人底嘅時候人哋都可以起到你底,所以唔想咁易畀人起底嘅話,要做好隱私設定!

 

  1. 見面前先傾電話

 

雖然依家大家好多時都只係透過文字訊息嚟聯絡,但見面前傾下電話,可以幫助你了解多少少對方性格大概係點,如果傾電話嘅時候已經覺得對方怪怪地,你就要再考慮下同對方見面係咪合適喇。

 

  1. 盡量揀朝早同多人嘅地方見面

 

保障自己人身安全,初次見面最好就揀番朝早同多人嘅地方啦,例如大型商場等等。唔好上對方屋企或者去偏僻地方!

 

  1. 搵Friend助陣

 

搵多個朋友陪住自己,有咩事都多個照應!

 

戴番個頭盔先,畢竟網絡世界危機四伏,以上講嘅嘢做哂都唔係100%安全,所以大家喺網上識朋友或者約網友見面之前,真係要諗清楚潛在嘅危機同風險呀!