2021年8月12日
呢一日，係 導你玩狂舞派 嘅第一節。
企劃入面安排咗跳舞呢一個環節， 活動前有參加者聽到要跳Hip hop會覺得好期待，因為以往都覺得啲人跳得好型，但自己都無機會去試。
同時，我哋社工都留意到唔少參加者都會有擔心，好想突破自己去嘗試跳街舞，但又會驚自己應付唔嚟，亦都會擔心自己無其他隊友跳得咁好。
「就算以前有試過係學校跳舞，但都係好耐之前嘅事，而我都係企係最後面既角色。」
「其實我好擔心呢一節，因為我真係無乜試過跳舞，好驚自己手腳唔協調，跳到唔好睇。」
當日小編我覺得深刻嘅，係留意到一位女組員嘅轉變。
Hiphop對於跳舞新手的確係一個大挑戰，其實活動開始咗無耐，都留意到小編自己組入面呢位女組員Kathy一路跳一邊縐晒眉頭，有幾刻仲眼泛淚光。
到break嘅時候，我去慰問一下佢嘅情況，
Kathy有少少眼濕濕咁講:
「我覺得跳舞呢樣野好似距離我comfort zone太遠，聽到要逐組出嚟表演，我覺得好似抖唔到氣，好大壓迫感。」
「我全程唔敢望住鏡入面嘅自己，因為會怪自己跳得唔好睇，其他人都可能會覺得我好差。」
但，呢位女組員都頂硬上，好勇敢咁完成左一次係人前嘅表演，完成表演個一刻， 佢壓抑左全程嘅情緒都忍唔住爆發，需要一啲空間去沉澱同抖一抖。
而最後，喺呢堂完結前，佢都好樂意同其他人分享自己啱啱發生嘅心情起伏。
喺佢分享入面，都不斷聽到佢怪自己做得唔好，亦會怪自己點解咁擔心其他人見到佢跳得唔好會批評佢，令到佢放鬆唔到去跳。
*****************
或者，係我地成長同人相處嘅經驗入面，曾經有一啲唔好嘅經驗，令到我地唔再太敢係人前展現自己，驚自己會被評價。
參加企劃嘅參加者，有唔少都同我地講過，佢地以住係校園生活都受過其他人嘅中傷，甚至成為咗被欺凌嘅對象，令到佢地慢慢變得收埋自己，唔想再被其他人留意到自己嘅存在。
*****************
當時，聽完Kathy分享，一班組員都無覺得佢嘅情緒波動係好唐突或者奇怪。
相反地，呢班組員都好鼓勵佢，亦都比左好多真心嘅建議，鼓勵佢去接納多啲自己，亦都分享咗好多提升自信嘅個人經驗。
離開嘅時候，Kathy 都講左一句令我有驚喜，
「好耐無試過有一班人咁接納自己。」
*****************
或者每個曾經係人際關係上受過傷嘅人，
都會希望遇上一班願意接納自己嘅人，
去令到自己有一個重新出發嘅機會
推動自己改造成為更好嘅人
*****************
Instagram：http://instagram.com/utouch_hkfyg
Facebook：utouch.hk
Facebook inbox：http://m.me/utouch.hk
Whatsapp：https://wa.me/85262778899