最近喺IG見到一張Netflix新劇 <以吾之名> 嘅截圖，
圖中嘅男仔問女仔：『妳生活嘅樂趣係咩?』
女仔嘅回答係：『生活本該係有趣嘅？』，
呢一個答案令我諗咗好多關於生活嘅本質到底係咩?
香港七百五十萬人每日都面對住排山倒海嘅工作、學業、生活壓力，
所有嘢都好似一波未平，一波又起咁壓埋黎。
到底生活要面對咁多嘢係為咗啲乜？
係為咗做想做嘅事？係為咗成就？係為咗實現自我？
可能每個人嘅答案都有唔同，
但我哋好容易會因為想達成生活上嘅嘢，
而忽略咗自己到底開唔開心，
到底生活中最重要嘅係成績？屋企人 / 學校嘅期望？
定其實係自己？
喺呢一輪嘅思考之後，我忍唔住開咗套劇嚟睇，
煲哂八集之後，我發現雖然套劇好多動作場面，
但其實講咗更多我哋成日都要面對嘅社會問題，
好似校園欺凌，失去重要之人等等。
主角喺劇中不斷受到打擊，
但佢抱住一個信念就能夠可以不斷咁企返起身，
不斷咁鍛煉自己，向住目標進發，
令我不禁覺得好熱血。
不過…現實中嘅大家又係咪真係咁輕易就可以渡過咁多難關？
生活中嘅難關總係冇劇集中嘅問題咁戲劇性，
但偏偏好多細節，會影響大家嘅情緒同處理，
而我哋自己都未必有劇中女主角一樣咁堅強，
咁有信念，
不過我哋擁有嘅絕對比劇中女主角多，
我哋擁有嘅係唔同嘅身邊人，
當一個人承受唔住嘅時候，
不妨望下四周，只要你願意講，
一定會有人願意聽，俾一份力量同你一齊面對。
****************************************************
請Like 我地Facebook / IG，以示支持。
如果大家想找人傾訴，我們很樂意和你詳談
大家亦可以嘗試我們的輔助小精靈，去了解自己，測試你的快樂指數。http://m.me/utouch.hk
****************************************************
Instagram：http://instagram.com/utouch_hkfyg
Facebook：utouch.hk
Facebook inbox：http://m.me/utouch.hk
Whatsapp：https://wa.me/85262778899