上回提要：阿風最後俾阿花拎哂手機啲資料，
仲要阿風過錢俾佢。
阿風個朋友係電話度問：「喂？冇聲嘅？得唔得閒啊喂？」
阿風回個神來：「我…好似遇到啲麻煩…」阿風就將佢係網上識到阿花、鐘意咗阿花、最後俾阿花呃嘅事一五一十咁同佢朋友講哂。
👥「你又真係蠢㗎喎…咁你都中招嘅？」
👦🏻「我點知條link有毒喎…咁而家點好啊？…」
👥「梗係報警啦仲問！你覺得你過咗錢，人地就真係會放過你咩！你屋企隔離間警署等啦！」
👦🏻「好…」
好快，阿風就係佢朋友陪伴下，
去咗警署報案錄口供。
錄完口供之後，個警察同阿風講：「下次上網識人還識人，記得小心啲，唔好亂咁開啲link啊。好彩你個friend叫你唔好過錢咋。通常啲人收到錢之後，會繼續要你過錢㗎。你今次算好彩㗎啦。」
👦🏻「咁會唔會捉到佢㗎？」
👮「你預冇乜可能㗎啦，始終佢用緊嘅ac都唔知係直定假，分分鐘係男定女都唔知。你唔想佢地繼續煩你嘅話，返去洗咗部機，同埋轉電話number啦。」
👦🏻「好啦……」
其實而家使用交友app識朋友係一件好平常嘅事，
只係大家要好好保護個人資料，
咁就用得開心又放心啦！
以下係五個網上交友嘅小貼士，等大家可以參考吓：
1. 保護自己個人資料
記得唔好咁容易透露你嘅個人資料，例如係住址、電話號碼、信用卡號碼、提款卡密碼、返學／返工地點等；亦都唔好係你嘅account度post一啲涉及你個人私隱嘅資料。因為你會唔知道係網絡上同你傾緊計嘅人係邊個、佢會拎你啲資料去做啲乜。
2. 理性分析，唔好盲目相信網友嘅說話
係網上交友嘅時候，大家都可能會向對方分享唔同嘅事，傾得好開心。但開心之餘，亦保持理性，分析對方講嘅嘢。係網絡呢個虛擬世界，我地好難保證對方講嘅嘢完全係真話，所以要留意吓對方講嘢有冇前後矛盾，善用Google大神，確認對方講嘅嘢係真定假。必要時相信自己嘅直覺，覺得唔對路，就唔好再keep contact啦。
3. 同網友相處嘅時候，保持警覺心
傾到咁上下，會約出嚟見面都好正常。不過，約出嚟唔代表真係完全可以信任對方，我地都要小心謹慎。初初約出嚟，記得盡量去啲人多或者熱鬧嘅地方，避免去啲偏僻嘅地方，更加唔好貿貿然就上咗對方屋企。就算唔約出嚟，淨係同對方靠message聯絡，都要小心，唔好咁輕易打開對方send俾你嘅link。
4. 同身邊信任嘅人分享
雖然網上識朋友係兩個人之間嘅事，但係都可以同身邊信任嘅朋友分享。正所謂旁觀者清，有時候同你嘅朋友分享吓你網上交友嘅情況或者對邊個有興趣，同佢地傾下拎人意見，好多時候佢地都會比你更加早發覺唔對路嘅地方，及早提醒你。如果怕尷尬唔想同朋友講嘅話，都可以Whatsapp我地，同我地傾吓㗎！
5. 切忌太早投放感情
可能網上傾計，會覺得對方好健談，覺得大家好sync，但記得一日未同對方見面，都唔好投放自己全部感情係呢一段關係入面。因為始終大家係透過虛擬世界去聯絡，未必會知道對方真實嘅一面。如果到時出到嚟見面先發現對方同自己想像中相差太多，甚至被騙財騙色，令自己感情上受到傷害就唔好啦！
除咗上面五個小貼士之外，大家仲有冇其他諗法呢？歡迎大家dm我地，話俾我地知你地嘅諗法！
#網上陷阱#網上交友#保護自己
＊＊＊＊＊＊＊＊＊＊＊＊＊＊＊＊＊＊＊＊＊＊＊
《ReBOT》親密關係鑑別程式
平台：Telegram
Telegram Bot名稱：@utouchreBot