《女朋友,可唔可以比返條腰我?》

女朋友有個習慣,就係好鐘意食嘢,本來鐘意食嘢係無咩問題,問題就係佢每次都好貪心叫哂好多種類嚟食,如果食唔哂就掟比我叫我清咗佢。

「清? 點清呀? 你食唔哂就唔好叫咁多架喇!」當然,呢一句我係唔會講出口,默默咁喺心入面呻訴。

有次同女朋友出街,經過買衫店,見到條Slim-fit牛仔褲大減價,就拎咗條去試。但當我喺更衣室換時侯,我臉色一沉,我竟然著唔落條褲!點解!?我係咪永遠都著唔到Slim-fit!!

腦海突然一閃,諗起上年女朋友都話自己肥,開始好多裙著唔到,我當然安慰佢話呢啲係幸福肥,怕咩!但佢始終介意,話要展現返佢引以為豪條腰,於是我就陪佢一齊減肥,為健康身體努力。

但呢家…..女朋友條腰返咗嚟佢身邊,但我條腰就已經唔見咗……點算?

我拎住條褲走出更衣室,女朋友見到我就問:「點呀?岩身?」

我沉重地搖搖頭,實在講唔出口,我著唔到呢條Slim-fit牛仔褲。但佢好似知道我心情,於是拎咗條褲照去比錢,我正想阻止時,佢講咗一句:「買住先,之前你陪我減,呢家到我陪你,直到你條腰返嚟可以著起佢。」

我眼淚即時湧現…..實在感動到無得出聲。雖然我肥又好,你肥又好都唔重要,最緊要就係大家健健康康,但你肯理解我同陪我,真係好感動,我相信條腰一定會返番嚟。

之後我地去咗食晚飯,女朋友話好肚餓就叫咗好多嘢食,我話:「唔好點咁多喇,一陣你食唔哂……」

女朋友就好有信心講:「我好肚餓呀,一定食得哂。」

結果佢最後都講呢句……

「我好飽,你食埋佢。」

發表回覆

你的電郵地址並不會被公開。 必要欄位標記為 *