學生抱怨：「我怕咗網上教學，直頭唔想面對。」
最近有唔少大專生大學生同我地反映，指出學校為咗停課不停學，都紛紛推出網上教學，希望繼續維持學生學習進度。
疫情影響下，網上教學似乎係一個好方法，令留喺屋企嘅學生繼續學習。
但就造成好多尷尬問題發生，令學生高呼「唔好再浪費我地時間呀!」
究竟網上教學發生咩事令到時下學生叫天苦地?
最講到利用網上教學，必推「Zoom」呢個教學Apps，幾乎各大院校同中小學都會利用Zoom嚟做網上教學。
網上教學原意係好，但似乎推行急進，唔少缺乏網絡使用知識嘅老師，對於利用網絡工具嚟教學似乎真係好大挑戰，仲未學點用時，已經被夾硬推出教學，令到教學質素大幅下降。
學生反映，學校課程時間經常三番四次作出改動，令人無所適所。
而課堂本應十時開始，卻不斷「試Mic」、「調整畫面」同「網絡延遲」等令到十點半先正式開始上堂，學生坐喺到望住個螢幕大感無奈同急燥。
最令學生尷尬問題，就係屋企環境唔係太整理，有時老師會要求「開Cam」證明學生在上堂，令身邊嘅同學都能夠從螢幕中睇到自己屋企，令人感到極度尷尬。
「我屋企唔係好有錢，間屋唔靚又細，但叫我開Cam比人睇到我屋企咩情況，我會覺得好難受。」
而疫情影響下，好多家庭成員都留喺屋企，令到學生網上教學時，其家人聲音亦嚴重影響其他人。
而教學質素亦會受到網絡延遲所影響，而好多Live嘅教學都缺乏重溫，令學生無法重溫令學習動機下降。
其中一位大專生亦說：
「有啲老師想我地網上學習時開心啲，多啲互動，我明白佢地原意係好，但真係令我地同學好尷尬，我相信老師都好尷尬，第一次對住個螢幕自言自語。」
我地uTouch網上青年服務都深感明白學生煩惱同擔憂，我地認為突如其來嘅肺炎疫症影響下，好多學校一時之間要推出網上教學的確存在好多挑戰，相信老師同學校方面都盡力去改善實際教學情況同聆聽學生意見，呢啲都係學習同實踐嘅第一步。
我地都建議網上教學可以由基上需要上改善：
建議設置「重溫」功能和不用「開Cam」和作出互動，咁樣保障到學生免受尷尬之苦。
但任何措施都可能有不完善地方，例如：如何證明學生真係聽緊書?
但最起碼可以減少尷尬同生厭問題，學生自然有動力去聽書，將來網上教學先會變得更完善。
不過最令學生無奈嘅係，學校通常透過冷冷冰冰嘅Email通知，對於學生抱怨或主張改善嘅想法，似乎聽不到。
唔知大家對於網上教學呢樣新模式有咩意見呢？
不妨反映比我地聽下=]