一直以嚟，當值嘅時候都聽過唔少求助個案會以聽歌作為放鬆嘅方法，聽落好似老生常談，同叫你唔開心沖個涼冇乜分別。
但對我嚟講，不論開心定唔開心我都會聽歌，音樂係一樣好特別嘅嘢，音樂可以疏導自己嘅情緒，可以令一個人更容易去釋放自己嘅感受，亦可以俾大家喺歌曲中搵到共鳴感，就好似突然有人明白自己一樣。我亦都相信每個人都有一首自己好鐘意嘅歌，喺唔開心嘅時候可以帶到力量俾自己。
由2020年林家謙嘅一人之境，到近期Mirror爆紅，幾位成員（私心係柳柳粉）嘅Solo歌都成功引起平時冇乜點聽廣東歌嘅朋友關注。
講起廣東歌，大家都一定有聽過當代香港詞壇嘅『兩個偉文』，林夕先生（原名為梁偉文）同黃偉文先生所寫嘅歌曲，而當中有一首歌，就係由陳奕迅演繹，C.Y. Kong作曲，林夕填詞嘅《不來也不去》。
以我自己嘅理解，林夕先生以佛學去分析人與人之間的聚散，由初初對得失嘅執著到慢慢學識放低，描述故事主人翁放低一段關係嘅心路歷程，到最後釋懷嘅時侯並唔係忘記當時令佢受傷嘅人同事，而係選擇接受呢一件事只係佢呢一生入邊嘅其中一條刺。
要學識釋懷一啲唔易，包括我自己在內都未做到，但係好想分享當中嘅一啲歌詞俾大家，以下都係我自己對歌詞嘅一啲見解，如果大家覺得有理解錯請見諒。
『留下我 在糞土當中 翻檢背囊 直到拾回自己，
掌心因此多出一根刺 沒有刺痛便懶知』
遇上情緒嘅當刻，好多時都要自己一個面對。感覺就好似喺糞土一樣，但因為生活，都係要喺傷口癒合前就要拉起自己，慢慢就會去逃避嗰種令自己難堪嘅情緒，亦會怕咗自己嘅情緒出現。
『血液裡 才遺傳悲喜，
誰亦難 避過這一身客塵，
但剛巧出於你』
不過其實生而為人，有悲傷、喜樂、唔同嘅情緒同埋執著都係一件無法避免嘅事。既然無法避免情緒嘅出現，我哋可以選擇嘅就只有點去面對同擁抱我地自己嘅情緒，因為種種情緒都係來自我哋自己嘅內心，我哋亦都要學識同佢一齊生活。
當然，管理情緒一啲都唔易，都係要靠大家一邊生活一邊學習，而當你覺得自己面對唔到嘅時候，除咗搵friend，聽歌之外，仲可以搵uTouch，同我哋傾下。
************************************
音樂世界浩瀚如海，全世界、不同國家、不同語言嘅歌數之不盡，但廣東歌對我一直都有一種特別嘅魅力，因為佢用嘅係香港人嘅母語，廣東話去演繹一首歌。希望大家都可以多啲支持廣東歌。