《年度之歌》

喺感情路上,當女方拒絕對方時侯除咗派張「好人卡」之外,好多時都會加多一句 :「我對你無感覺,Sorry。」

當聽到無感覺時侯,好多人都唔明究竟輸咗啲咩,究竟咩係感覺? 成日聽到有人話 「最緊要「岩Feel!」」而所謂嘅Feel究竟係啲咩黎?

喺人生路上,我地試過暗戀人,明戀人,追求對方,亦會遇上好多曾經同自己曖味過同拍拖過嘅人,有人遇上嘅人可能十隻手指都數得到,有人可能遇上數十個以上不等。

開頭認識到對方,會好想知對方究竟係咩人,好想知佢性格,興趣,背景,熟落咗之後似乎「曖味」係必然之事,再行落去一係拍拖,一係就無疾而終,惡劣啲可能朋友都做唔成。

鐘意人嘅感覺就好似聽歌咁,我相信好多人都試過聽歌聽到上哂癮嘅日子,當你鐘意聽某一首歌嘅時侯,你會不斷重覆又重覆狂Loop首歌,無論電腦,ipod,全部都係行住」單曲循環」,嗰刻你唔聽唔舒服,出街都會哼住首歌Melody,腦海浮現出首歌嘅MV,口中經常唱出副歌頭兩句歌詞(因為唔記得之後點唱),嗰刻你曾經會諗依個世界再無任何歌都可以取代到佢。

你唔會理唱歌嗰條友係邊個,都唔會Care作詞同作曲係邊個,賤人又好,幾衰嘅人都好,你都唔會理,你鐘意嘅係首「歌」,點解鐘意?岩Feel囉! 點解一首歌有人一聽就鐘意,有人聽極都唔會鐘意,就係有Feel都無Feel嘅分別,唱歌條友靚唔靚仔有唔有錢都係Bonus,唔係重點,最緊要係岩Feel! 就好似古天樂曾經唱過」 今期流行」 你唔鐘意首歌但鐘意古天樂,但你聽到首歌都覺得有啲頂難,更何況會跳佢隻舞? (今期流行~~流行追命林琴~~)

Feel,可以Keep幾耐? 問下你自己曾經鐘意到死嘅歌,最近有冇聽返? 當你無Feel嘅時侯,唔好話聽歌,見到張List下一首就係嗰首歌,你即刻飛咗首歌唔播,因為你已經厭,唔想再聽,之後話唔聽唔聽…..可以幾個月, 甚至幾年都可以唔會聽到首歌。

但Feel依樣野好奇妙,好耐無聽首歌時侯,當你聽返,你會感到好舒服,曾經愛上依首歌嘅回憶浮哂出嚟,聽聽下又覺得幾岩自己,亦忘記當初厭倦首歌嘅感覺,好想再一次瘋狂愛上返首歌。

但無可能,因為無理由2018年頒獎禮會頒返2009年嘅歌!? 時代唔同,好多野都返唔到轉頭,只能嘆錯的時間對的人,唯有得閒聽下首」舊歌」回味下,亦概嘆一下所遇上嘅人新不如舊。

大家可能曾經成為過某人嘅「年度之歌」,亦曾經遇上自己嘅「年度之歌」
無奈錯的時間亦錯的人,敵不過感覺洗禮
只能一切在心中,回味那時美好回憶。

年度之歌,你有遇上幾多首?

全年度有幾多首歌 給天天的播
給你最愉快的消磨
流行是一首窩心的歌
突然間說過就過

誰曾是你這一首歌 你記不清楚
我看著你離座
真高興給你愛護過
根本你不欠我什麼

誰曾是你這一首歌 你記不清楚
我看著你離座
很高興因你燦爛過
高峰過總會有下坡

誰又妄想一曲一世 讓人忠心到底????

(年度之歌,謝安琪)