《當你妄想將性伴侶變成終生伴侶時,已經出現危險訊號》

過去一年做網上輔導時侯,不時遇到好多關於性伴侶問題嘅個案。

一直以來我都覺得網上搵Sex Partner(SP)係一個都市傳說嚟,點會真係咁易比你搵到?

「 SP意思係指只有性交,沒有任何責任和感情付出,大家都只係各取所需,滿足性慾。」聽完都覺得呢段關係係咪真係存在? 但原來的確存在。

可能對於某部份人嚟講,呢段「無責任成本」嘅關係係相當吸引。唔少網民曾經對於SP呢樣作出評論,佢地認為拍拖係一件好花心神嘅一段關係,不但要花心思金錢去哄伴侶,亦要接受伴侶情緒脾氣,到頭來要求鍚一啖都可能要滿足伴侶先比鍚!

起初睇到呢類評論,腦海都會浮出 「有冇咁誇張」
但見到佢地字裡行間浮現出字字鏗鏘、擲地有聲嘅句子,就會覺得係咪真係有呢類經歷?

唔少個案案主表示自從離開校園生活後,踏入社會工作,要識到異性已經好難,隨住年紀漸大,生活上嘅寂寞,父母嘅催逼,有冇拖拍已經變成一種壓力。

如果現實上識唔到朋友,唯有轉戰網上,反正唔洗成本,岩就繼續傾,唔岩隨時一個Del制已經將所有對話清除,就係呢種既來之、則安之嘅心態,玩玩下,心態原本想正正經經識個女朋友,都變成想搵一個SP。

可能我思想比較傳統守舊,會覺得男性搵SP都仲可以理解,但為何女性都會搵SP?
其中一個案主「May」表示:「我夠想正正經經識個男朋友,但真係好難,你地男人就可以叫雞解決性需要,唔通我地女人去叫鴨咩?」

SP關係似乎能夠解決各自雙方嘅期望,既然大家你情我願,好似真係無咩問題,但其實SP關係一旦開始同持續落去,問題就會隨之以來。

其中一個案主「Peter」講過:「喺呢個網絡大時代底下,好多交友Apps已經變成約炮搵食嘅Apps,要搵到一個大家都夾嘅SP,就好似尋寶一樣,搵嗰陣都已經感到刺激,到你真係搵到之後,真係唔會咁輕易放手。」

唔輕易放手某程度上已經付出咗感情喺呢段關係上,其實已經響起咗危險信號。

當你覺得同對方好夾,相處期間好舒服,好想將對方據為己有,亦會開始唔想其他人接觸到你性伴侶,你嘅愛情價值觀亦開始出現偏離,即使對方本身已經有男/女朋友,亦明知大家唔會有好結果,亦會一意孤行地繼續維持SP關係,為嘅,只係能夠同對方見面,即使對方只係想要你嘅肉體。

有時侯接觸呢類個案,有時侯自己都會有情緒,一來想像唔到點解有人沉醉呢段無結果嘅關係,二來亦係對本身伴侶一種背叛,但「愛情」本身就係一件無得理解清楚嘅概念。

好多個案帶來唔同情況來搵我地傾,大部份都有一個共同想法,就係希望對方能夠從性伴侶關係變成伴侶關係,但一個由SP關係而結識到對方嘅愛情,就會由「無責任關係」變成「有責任嘅關係」,好自然就會衍生另一種相處問題。

雙方亦會時不時擔心對方係咪仍留戀肉體而一齊或外面繼續有SP…… 
種種憂慮底下,呢段關係仲會唔會健康發展落去
而可以問一問自己,呢段關係係咪真係自己想要
如果想要,那問一問自己能否承受得到衍生出嘅憂慮同困難

拍拖好難,要搵一個岩自己夾自己嘅人拍拖就更難
但難,總好過濫而帶來的種種問題
諗諗自己,不值得被人利用感情,不值得被人利用肉體
你可以選擇得更好

 

29/11/2017

發表回覆

你的電郵地址並不會被公開。 必要欄位標記為 *