《小學生的網絡欺凌》

大家可能都知,我哋uTouch會提供網上輔導服務,事實上,嚟搵我哋傾訴嘅好多時都係中學生或者大專生。

 
所以,每當有機會同年紀比較細嘅對象傾,我印象都會特別深。

 
某一個星期四嘅下午四點,我當值嘅時候認識到一個小六學生阿恩。

.
.
.
「學校啲同學成日都蝦我。」
.
.
.
「佢哋成日都唔理我。」
.
.
.
「佢哋搵咗我張相嚟做Icon。」
.
.
.
經過一番了解,原來阿恩皮膚一直都唔係咁好,因為咁,佢成為咗其他同學取笑嘅對象。

 

爛面恩、月球小姐、披住皺皮嘅狼,聽住呢啲花名,我都不禁感嘆一聲: 依家啲小學生真係好有創意,只係,佢哋係將呢啲創意發揮喺人哋嘅痛苦之上。

 

對於呢啲校園欺凌嘅情況相信大家都唔會感到意外,可能大家唔多唔少都有經歷過,甚至有機會做過欺凌人嘅角色。

 

最令我慨嘆嘅係,小學生嘅欺凌已經延伸到網絡上。

 

雖然唔係個個小學生都有手機,但同阿恩傾嘅過程我發現,有手機嘅人數比例比我想像中仲要高。

 

以阿恩嗰班為例,接近三份一嘅同學仔都擁有屬於自己嘅智能電話,至於剩低嘅三份二,即係唔係自己擁有,番到屋企都可以借用屋企人嗰部。

 

而令阿恩嚟求助嘅原因,係因為班Gp嘅Icon畀某名同學轉咗做一張阿恩嘅大頭照。

 

然後,Gp裡面開始有同學攻擊轉Icon嘅人。
.
.
.
「想點?」
.
.
.
「食緊飯呀__!」
.
.
.
「見到都唔想撳入個Gp度。」
.
.
.
雖然喺個Gp度出聲嘅人唔多,但呢啲說話,就好似一把又一把嘅刀咁插喺阿恩身上,而且一時之間亦都冇人出言制止。阿恩覺得好驚好無助,同時亦唔知可以點處理,唯有扮睇唔到同唔回應。

 

到咗第二日番學,阿恩覺得所有同學望住自己嘅眼光都好奇怪,個個都好似笑緊佢咁,有啲更過份嘅同學甚至喺佢面前叫佢花名、取笑佢。

 

由嗰次之後,阿恩每日番學都提心吊膽,亦唔敢再喺個Gp度講嘢,有段時間甚至唔敢撳入去個Gp度,因為佢好怕,好怕自己一撳入去就會再見到嗰啲好難聽嘅說話。

 

喺事發兩星期之後,阿恩終於忍受唔住,嚟咗搵我哋傾訴,喺照顧阿恩情緒嘅同事,我同阿恩都有傾過點處理呢件事比較好,我好記得阿恩一開始已經同我講無論點佢都唔會Quit Gp,佢形容如果畀人笑係身處地獄,Quit Gp之後佢就係身處十八層地獄,因為到時,佢連人哋喺佢背後講佢咩都唔知,而且Quit Gp呢個行為都可能會被其他同學放大,繼而引發更加多嘅欺凌事件。

 

經過多番鼓勵之後,阿恩鼓起勇氣同屋企人講咗自己喺學校嘅情況,屋企人聽到之後都相當驚訝,同時都支持阿恩作出反抗,喺得到阿恩嘅同意之下,我哋第二日就聯絡咗佢所讀學校嘅駐校社工,交代阿恩嘅情況。儘管事件已經交由校方處理,但我仍然一路喺網絡上支援住阿恩,因為我相信有啲事發生咗,佢未必敢第一時間同學校嘅老師或者社工講,就好似佢一開始嚟搵我哋嘅時候咁。

 

阿恩嘅故事提醒咗我,依家呢一代係喺一個網絡發達嘅環境之下長大,喺網絡帶嚟方便嘅同時,亦令呢班心智未成熟嘅小朋友手握利器,甚至做出咗一啲傷害到其他人嘅舉動都不自知。

 

網絡,係一把雙面刃。

 

如果你都有受到網絡欺凌嘅問題困擾,可以嚟搵我地傾下,無論點,我哋都會同你一齊撐。

————————————-
【uTouch】http://utouch.hk
Instagram:utouch_hkfyg
Facebook:utouch.hk
Whatsapp:62778899

發表回覆

你的電郵地址並不會被公開。 必要欄位標記為 *