《即使唔識對方,但我仍然好介意佢點睇自己……》 

某個晚上,有個20歲嘅男仔向我地求助,佢叫David。

傾談之間,佢表示自己有社交恐懼症,已經有幾年無接觸過外人,連書都無讀,一直匿喺屋企,最近感到真係想改變,一時之間唔知可以向邊個求助,但見到我地uTouch網上服務,於是膽粗粗搵我地傾計。

大概傾咗幾晚,我一直都覺得對方談吐都正常,只係字裡行間仍然感受到對方對自己生活同自我價值有點欠缺自信,但整體來說都唔錯,想像唔到佢已經係幾年無接觸過外人。

於是我就主動相約佢見面,起初佢都有點抗拒,說服務可以一直停留在網上處理嗎?

我拒絕,我試著解釋原因,想改善社交能力,最好嘅治療方法都係盡量同人相處多點,溝通多點,練習一下如何同人進行社交溝通,雖然過程係痛苦,但總要面對同克服,所以我都鼓勵對方可以出嚟見我。

之後對方就消失了,我再搵佢都係已讀不回。

大概過咗一星期,David再次出現了,佢對我說:「諗咗好耐,我都係想見你。」

我好欣賞佢份勇氣,因為我知道,一個同社會脫離幾年嘅人要再次踏出去係相當大挑戰。

當日,我地相約咗下午三點喺我地中心見面,而我下午2點50分已經喺中心門口企喺到等待佢出現,因為我怕佢嚟到中心之後唔敢開口搵我或者見到中心入面嘅陌生人會感到痛苦而離開,所以我一直企喺到等佢出現,視線一直望住遠方,內心不斷同自己講:「加油,David。」

我地做網上青年服務,間唔時都會被對方「放飛機」,已經習以為常,始終要踏出嚟見面係需要多點時間考慮,但過去同對方傾談之中,我對David更有信心。

結果,下午3點半,David都未出現。同事問我係咪仲等? 我望望前方,笑著說:「佢嚟了。」

眼前出現一個一直低著頭行的青年,我就估到佢就係David。

當我接觸佢時侯,佢成身震哂,滿臉通紅,冷汗不斷滲出。我擔心地問:「你ok嗎?」

David無出聲,一直震。

後來我帶佢到輔導室,我就播啲柔和放鬆嘅音樂,等David放鬆一下先開始對話。

「ok嗎?」

「我ok。」

接著,David再次分享佢經歷我聽,原來David 中四之前都係一個正常青年,有一大班朋友,有正常社交生活,會出去玩,總之就無咩問題……但自從有一日放學,佢突然感到頭暈,之後成個人都感到好辛苦,覺得身邊嘅人都好害怕,自此……喺一個毫無預警底下,佢怕了人,佢怕了接觸人,佢怕了與人相處,一直維持了呢個生活兩年。

佢父母開頭見佢有咁大轉變,都逼佢返學,但自從醫生話佢有社交恐懼症後,父母都覺得個仔係病了,所以都唔勉強佢再返學了,只求佢平安在家就好了。

但呢種生活對於David來講實在太悶了,人大了,亦想作出改變,可以正常打工賺錢,做自己想做的事,於是佢就開始向外求助。

每次同David對話,九成發言都係我,因為David實在唔想講太多嘢,同佢係線上嘅佢判若兩人,我亦展開同佢每星期見面嘅工作。

包括一些簡單社交技巧,配合埋認知行為治療,我亦叫David寫下日記,亦教導David當恐懼來臨時應該如何放鬆自己……

因為我留意到David一直都好介意人地點睇自己,即使喺街上面互不相識嘅路人,當對方望佢時,佢就會諗對方點諗自己……繼而愈諗愈恐怖……所以我都用心同佢分析每一個狀況。

直至有一日,我打開日記最新一頁,內容是David同朋友去海洋公園。

「海洋公園?朋友?你同朋友去咗海洋公園?」我驚訝係因為David暫時只去過九龍新界,從來未踏入過港島區,更唔好講同朋友去。

David點了頭,然後慢慢一字一字分享經歷,我亦細心閱讀佢嘅日記。

原來David嘅昔日中學朋友邀請佢一齊出去,雖然過程之中David都感到辛苦,特別排隊時嘅過程,但回望過來,David亦為自己應約感到高興,心中恐懼亦比佢想像中無咁嚴重,似乎是個好開始,我亦鼓勵David能夠保持下去,將來一定可以好返,重投正常社交生活。

好多人以為自己怕羞,見到人臉紅都話自己有社交恐懼,但其實未必。
但如果因為呢種情況確實影響到生活,最好盡快求醫,因為唔好好處理,會為情緒帶來相當大嘅困擾,後果可以好嚴重。

或者
如果你發現身邊有人經常唔出現或唔太識講嘢,你就要關心一下對方,可能對方都係等緊一個機會求助。

社交恐懼嘅人唔係唔想同人「連結」,佢只係害怕同人「連結」不到。

《完》

*************************

請Like 我地Facebook / ig,以示支持。

如果大家想找人傾訴,我們很樂意和你詳談
大家亦可以嘗試我們的輔助小精靈,去了解自己,測試你的快樂指數。
http://m.me/utouch.hk

https://hearforyou.hk/tc/home
想了解多d 有關情緒服務,可以上呢個網址=)

#情緒支援
#hearforyou

******************
Instagram:http://instagram.com/utouch_hkfyg
Facebook:utouch.hk
Facebook inbox:http://m.me/utouch.hk
Whatsap:https://wa.me/85262778899

發表回覆

你的電郵地址並不會被公開。 必要欄位標記為 *