由細到大我都係一個好稱職嘅聆聽者。
自細個起，屋企人講咩我都會照單全收。我唔會反駁，亦從來唔會埋怨，佢哋叫我做乜，我就做乜。其實學業壓力唔係冇，但個個都有壓力架啦，點解我要話俾人知？
記得中四嗰陣我有個friend叫達仔，佢失戀嗰期，我日日都陪住佢，有一日放學行行下，行到去我坐車嘅巴士站，佢同我講：
『你真係一個好好嘅朋友，每當需要你嘅時候，你都會喺度，唔該哂你。』
我立即當然就好尷尬，回敬一句：
『搞笑咩講呢啲，大家咁話啦，心照。』
然後大家互相搭咗下膊頭就各自返屋企。我望住達仔略為瘦削嘅身影，我好興幸有人當我係佢嘅真心朋友。
諗諗下，我又真係好少同達仔講有關自己嘅野。不過其實達仔已經算係我好熟嘅朋友，至少佢失戀嗰陣曾經喺我嘅懷抱入面喊過。
可惜嘅係，我同達仔喺中六畢業就斷咗聯絡。我讀緊大學嘅時候，每次經過旺角望到我以前每日放學等車嘅車站，我都會諗起達仔。個巴士站並冇變過，變咗嘅係我哋，我唔知嗰一刻達仔諗緊啲咩，但嗰一刻我係諗住佢。
時光飛逝，轉眼就大學畢業幾年，喺大學我都識到我嘅女朋友Jenny。
有一日我去接佢收工，佢一見到我就撲上黎伏喺我心口度喊，話返工返到好大壓力又好唔開心，跟住落嚟就係長達一小時嘅工作辛酸史，呢一個鐘我都有好認真聽每一件事，包括佢無能嘅擺款上司，女同事之間嘅辦公室政治，欺凌，等等。
講完一輪之後，Jenny攬住我同我講：
『你真係一個好好嘅男朋友，每當我需要你嘅時候，你都會喺度，多謝哂你bb。』
聽到呢一句，我腦入邊突然閃過達仔嘅身影，諗起當時喺巴士站分別嘅畫面。我立即喺Jenny面前拎咗部電話出嚟，㩒入聯絡人，搵到達仔個電話，我好猶豫咁停咗達仔嘅聯絡人畫面，Jenny有啲困惑咁望咗我一眼，之後就一下子捉住我隻手指㩒咗落去。
電話嘅另一邊好快就傳嚟好耐冇聽過嘅聲音：
「喂，阿明？有事搵我?」
咁耐無搵大家，以為大家關係已經一早完結，但原來只需要簡單一個電話就可以將斷咗嘅線拉返番嚟。
而我聽到達仔嘅問候，眼淚真係忍唔住係咁流，眼泛淚光哽咽：
「係…..真係有事…..我今日俾公司炒咗，不過咁耐無見打嚟就咁講呢啲好似好怪咁，所以我想約你見面傾，順便當聚下舊。」
其實我無諗過搵達仔訴苦，因為從來只有我聽人訴苦，但當達仔一句 『有事搵我? 』 ，我過去嘅一直屈住屈住嘅情緒忍唔住同達仔講…..
原來，我都需要同人訴苦，原來，朋友係需要互相支持，原來，想搵人傾計都唔係咁難開口。
聽到我俾人炒咗嘅呢個消息，Jenny喺我身邊呆咗。事後佢同我講返，佢唔係因為我俾人炒咗所以呆咗，而係咁大件事，我竟然可以聽哂佢一個鐘頭嘅辦公室故事先至講出嚟，佢嗰一刻係有啲自責點解自己冇諗過問我今日過成點。
我聽完之後笑咗出聲同佢講：『由細到大我都係一個好稱職嘅聆聽者嚟架啦。』
************************************
有一種人係習慣咗做一個聆聽者
慢慢都會停止咗表達自己嘅情緒同感受
長期累積負能量
對自己同身邊嘅人都唔係一件好事
大家未必有勇氣去同身邊嘅人表達自己久未釋放嘅情緒
但不論大小事
uTouch都會做你嘅聆聽者。
＊＊＊＊＊＊＊＊＊＊＊＊＊＊＊＊
請Like 我地Facebook / IG，以示支持。
如果大家想找人傾訴，我們很樂意和你詳談
大家亦可以嘗試我們的輔助小精靈，去了解自己，測試你的快樂指數。
http://m.me/utouch.hk
******************
Instagram：http://instagram.com/utouch_hkfyg
Facebook：utouch.hk
Facebook inbox：http://m.me/utouch.hk
Whatsapp：https://wa.me/85262778899