最近有個朋友阿傑同我講,
『我…有啲想識返個女朋友。』

大家就咁睇呢句說話可能未必有好大嘅感覺,
但我識咗阿傑十幾年,
今次係第一次咁直接面對面同我講呢一句說話,
對我嚟講都真係幾衝擊。
講講下先醒起雖然阿傑條件唔差,但係一直都係A0,仲未有過拍拖嘅經驗。

唔知係因為寂寞定係想搵到心靈依靠,
阿傑先有呢個諗法,
但係既然佢講到,作為朋友嘅一定幫佢部署下!

不過當問到阿傑想識/適合咩類型嘅女仔,
阿傑就好似冇乜方向,
諗唔到自己想要嘅到底係啲咩…

既然阿傑諗唔到,
我同幾個朋友就幫阿傑約咗幾個女仔一齊玩下board game傾下偈咁。
事後我同幾個朋友都想問下阿傑嘅體驗如何。

阿傑同我哋講話玩得好開心,
因為工作關係,自己身邊本身都好少異性朋友,
多咗同異性相處嘅機會都係一件開心嘅事,
喺講完呢句之後,
阿傑臉上露出咗一絲得我留意到嘅苦笑…

其他朋友走哂之後,
我問阿傑:『上次出去玩真係咁開心?』

阿傑:『同佢哋出街前,我都好期待,但出到嚟之後,我好似有啲迷失,本身自己都比較被動,又冇乜興趣,想講嘢嗰下先發現自己原來真係冇話題,再諗深一層,到底點解我想識女仔同想要啲咩都唔知。』

我慢慢再同佢傾下,
發現阿傑同自己相處嘅時間好少,
自己嘅興趣同喜好都冇乜,
亦都冇留意自己嘅性格同特點。
原來佢一直冇點放心機,冇花時間喺自己身上,
反而會留意好多朋友同外界嘅事。

阿傑:『原來喺認識其他人之前,首先要認識咗自己先…』

****************************************************
好多時生活上我地都會諗點樣可以同人熟啲,
投其所好去迎合其他人,
但偏偏忽略咗自己真正嘅需要同喜好。
其實嘗試融入身邊嘅人係一件好正常嘅事,
不過唔少人都會因為咁而迷失咗自己。
當你去認識其他人嘅時候,其他人都一樣認識緊你,
與其只係將自己變成他人的模樣,
不如多啲發掘、認識同表現自己,
同真正欣賞你嘅人做朋友啦~

《ReBOT》親密關係鑑別程式

平台:Telegram
Telegram Bot名稱:@utouchreBot

發表回覆

你的電郵地址並不會被公開。 必要欄位標記為 *